Newborn Shoots

Dit was so lekker om die pragtige gesinnetjie te ontmoet! Cindy en Heinrich is die mees natuurlike en ontspanne 'nuwe' ouers wat ek in 'n lang tyd gesien het. Hulle is nog bloedjonk en dis so verfrissend om te sien hoe gemaklik en ontspanne hulle die babatjie met hope liefde en humor in hulle lewe verwelkom! En is klein Alexander nie net die pragtigste ou dingetjie nie! Geniet julle babatjie, ek is seker dit gaan nie te lank wees voor daar nog 'n paar klein voetjies op die plaas rondhardloop nie! Julle tweetjies gaan wonderlike ouers wees. Baie dankie vir die geleentheid om Alexander se eerste foto's te kon neem.

Rudie en Sharon se pragtige prinsessie is hier! Al het Amelia nie juis slaap-planne gehad tydens die fotosessie nie, is hierdie foto's suiwer "baby-candy" en mens wil daai perfekte babalyfie net vasdruk en opsoen! Baie geluk met julle pragtige dogtertjie en dankie vir die voorreg dat ek julle eerste gesinsfoto's kon neem. Geniet haar elke oomblik van elke dag! Ek is seker sy gaan vir julle eindelose vreugde en liefde bring. Julle gaan wonderlike ouers wees!

Sedert ek die pragtige Janine en Marcel afgeneem het terwyl hulle vir Mile verwag het, het ek gebrand van nuuskierigheid om die nuwe mensie te ontmoet. En dit was definitief die wag werd, want die meisie het net soveel persoonlikheid as "looks" gekry! Sy wou nie juis veel weet van slaap nie en het net rustig geraak as haar mamma en pappa haar handjies styf vashou. Dis te dierbaar! Terwyl sy wakker was het sy daai kleine lyfie so gewikkel en woel dat ek die kostelikste gesiguidrukkings kon afneem. Geniet julle lieflike dogtertjie, ek is seker sy gaan julle nog ure se vermaak en tonne plesier verskaf!

Ons familie het onlangs 'n pragtige babadogtertjie ryker geword. Ek het een Saterdagoggend bietjie by my skoonsussie gaan kuier en 'n paar foto's van haar en haar derde dogtertjie geneem. Ek verwonder my altyd aan die volmaaktheid en onskuld van sulke pasgebore babatjies. Dit bly darem maar net een van die grootste wonderwerke en voorregte wat aan ons geskenk word om te geniet. Daarna het ons twee gesinne en my skoonouers 'n heerlike middagete-piekniek aan mekaar geslaan en heerlik gekuier. Welkom in die familie Judy!

Wat 'n wonderlike voorreg om vir klein Jana te kon ontmoet en afneem! Nadat ek vir Gerhard en Janien ontmoet het tydens die neem van hul swangerskap foto's was hulle so opgewonde oor die koms van hulle dogtertjie dat ek self begin uitsien het na haar koms. En is sy nie die pragtigste ou babatjie nie! Stroopsoet en doodrustig, nes haar ouers. Mag sy vir julle nog baie jare se vreugde en geluk bring!

Jean en Elonya het nog 'n pragtige dogtertjie ryker geword en ek was so bevoorreg om vir Ava ook te kon afneem. Sy is die rustigheid vanself en dit was 'n absolute plesier om so 'n geborge en tevrede pasgebore babatjie te kon afneem. Dit laat my altyd in verwondering oor God se grootheid as ek so van aangesig tot aangesig een van Sy grootste wonderwerke aanskou...