Albie en Heloise troue

Mens kan sommer dadelik sien as dit twee beste vriende is wat met mekaar trou. Twee “soulmates”. En as daardie huwelik dan nog boonop gegrond is op ‘n vaste geloof in God dan kan dit mos nie anders as om ‘n reuse suksesverhaal te wees nie! Dit was my gedagtes toe ek met ‘n glimlag wegstap van Albie en Heloise se troue. Dit was ‘n groot voorreg om te kon deel in hulle spesiale dag en te sien met hoeveel opregte liefde, ondersteuning en gebed hulle omring word. Heloise het pragtig gelyk in ‘n olyfgroen rok met die mooiste kantdetail en juwele om die prentjie mee af te rond. G’n wonder dat Albie nie sy oë van sy bruid kon afhou nie! Heloise het die vorige aand in een van die gastehuisies op Ongegund Landgoed geslaap en kon dus sommer oorstap na die kapelletjie op die perseel waar hulle in die huwelik bevestig is. Daarna is die onthaal in die gebou net langsaan gehou so dit was glad nie nodig vir ‘n troukar of enige gerondryery vir die gaste nie. Dit alles het bygedra tot die intieme gevoel van die dag. Nogmaals dankie dat julle my toevertou het met die taak om die wonderlike geleentheid vas te vang. Mag daar nog baie jare van geluk vir julle voorlê!